السلام عليكم ورحمة الله وبركاته
لك وكل عام وانتم بالف الف خير بمناسبة اقتراب عيد الاضحى المبارك
بس حبيباتي هل الموضوع ما بيقتصر على المعايدة ....لا لا ابدا ......... لاني بهل الموضوع الحلو الامور حبيت ارصدكم وخبركم اكتر عن ابعاد وفوائد العيد ببلدنا المجيد ...... ويلي ما شاء الله تجاوزت كل شي اسمو حدود .....ومن هل المنطلق خلونا نجود بالموجود ...
وخصوصي اذا كان هل الموجود بايام العيد بيستدعي انك تنكـب وتديـن وتكركــب حياتك لشهرين تلاتة بعد العيد او قبلو احيانا !!! .....بس يا اخي شو بدي قلك يعني عيد ... الله اكبر .. لك وما بيجي الا مرتين بالسنة .....
بقى خلونا معلش ننكب شهرين بعدو وين المشكلة .......... يعني انا ابدا مو شايفة اي مشكلة في كونك موظف راتبك 20 الف وعندك ست او سبع اطفال بدهن كل واحد على الاقل غيار لحتى يلحق يهريه بهل الاربع ايام المباركة......
علما بانو صحاب محلات الالبسة عنابالبلد كتتير حبابين واكابر ...... لك وعطول مستعجيلن وبيشتغلو باقصى سرعة لتامين اكبر كمية من الانتاج والسلع لبيعها بموسم العيد وحتى ولو كانت بربع الجودة وضعف السعر!!!!
بس كل هذا عزيزي المواطن لصالحك .....مشان تقدر تعطي راتبك كلو للمدام يلي رح تروح تشري فيه للولاد دفعة وحدة!!!
( وطبعا انت ما رح ينوبك شي )....بس انظر الى الجانب المشرق بالموضوع ويلي هو.......... انو ماعاد رح تقلق بالك او تفكر وين بدك تروح بهل القرشين يلي معك لانو متل ما بتعرف العملة يا ابن الحلال هي يلي بتشغل البال!!!
بقى هلق صار فيك تنام وبالك مطمن وكرشك فاضي .........ليش فاضي- انا بقلك- لانك يا عزيزي المواطن بتعرف انو الراتب طار!!!... وبدك حلو للعيد بقى بتفضل تعمل تقشف لمدة شهر او شهرين قبل العيد لحتى تقدر توفر حق علبة الحلو يلي سعرها بيتراوح بين 700 الى 1000 ليرة فقط بالحالة الوسطية ......
بس باعتبارك مواطن ما بتحب تنحط بمواقف محيرة مثلا انك تنزل على الميدان باسبوع العيد وتقعد تحتار باي نوع واي صنف بدك تشتري منو !! لك شو بدك بهل اللبكة ...اصلا قلبك الطيب ما رح يقدر يدفعك ويحفزك لانك تشتري من عند بياع وما تشتري من عند غيرو(مواطن حنون ما بنقدر نقول شي ) .............بقى رح تكتفي بالعودة الى اصول صنع المعمـول المنزلـــي .......وبهل المناسبة السعيدة اكيد وبكل سرور رح تنتهز الفرصة لتحكي لاطفالك الصغار عن ذكرياتك وطفولتك بايام العيد ....
(ويلي كانت عبارة عن طلعة على القبور ونزلة لتبويس ايدين ابوك وامك والاكتفاء باكل المخلل ودبوس القاضي ويلي هو عبارة عن تفاحة مغمسة بالقطر ويلي هي صحية اكتر من حلو العيد يلي دفعت دم قلبك حق مواد صنعو بس بيضل ارحص من يلي كنت رح تدهور ...وتتهور.... وتشتريه لما نزلت على الميدان وخصوصي لما انشكلو عيونك بمنظرو وصفتو الحلوة البديعة وعلما بانو مو كل مين صف الصواني بينقال عليه حلواني !!بس اكيد هل القاعدة لا تطبق بالشام لانو سمالله مشهورين الشوام بصفهن للصواني ....)
وكمان هل السبب ابدا ما رح يكون لبخ الافكار وتحضيراطفالك نفسيا لامكانية عدم حصولهم على عيدية او على الاقل على مبلغ كبيرمنها !!!لا لا ابدا هي مجرد ذكريات عم تلمع بسجل حياتك ......حياتك يلي انك هلق صار عندك وعي اكبر لكل يوم فيها بداية بلحظة زواجك ونهاية بولادة طفلك السابع ...........
وهي الشي يلي رح يخليك تحمل بقلبك احترام وتقدير اكبر لجمعيات ومنظمات وحمالات تحديد النسل يلي لو انك سمعت كلامها كان ممكن تكون هلق بوضع احسن بوجود طفل او طفلين بحياتك بدل الستة سبعة يلي مو عارف من وين بدك تدبر امورك معهن...........
بقى شفتولي فوائد العيد شو حلوة....وشو عديدة ...وشو متأصلة وتواكب كافة مجالات وانواع المحبة والتاخي والتعاضد بزمانا الحاضر ........
بس لازم تنتبهو انوفوائد العيد لا تقتصر على الاحياء وانما تطال الاموات ايضا ؟!!!... لانو انت بهل الحالة هي وبهل الفترة الزمنية هي تحديدا رح تتحول لتصير انسان ذو مشاعر جياشة يعاني من جرعة شوق كبيرة للاموات يلي من عيلتكم وذلك لعدة اسباب:
اولها انو يلي كان يدينك ثمن ما ذكر سابقا .................مات .....
او رح تشكلك هل الوفاة سبب كتير حلو, صريح ومهرب مباشر لحتى تعتذر من ضيوفك عن عدم تقديم الحلو ......والاكتفاء بالقهوة المرة ....
او رح تتجسدلك على شكل مشاعر وفاء واحترام لابوك يلي توفى من اربع سنين بس هلق صار الوقت وان الاوان لحتى ما تشتري لاطفالك كسوة على العيد من مبدا" كيف بدكن تشترو اواعي وجدكم ما صرلو الا اربع سنين متوفي" ومع كم دمعة بيقتنعو الاولاد لك والله يستر ما بيلبسو اسود .....
بقى بالختام ومن صموصة قلبي بحب قلكم
كل عام وانتم بخير
ALZEER
الرئيسية 
