بالفعل إنك مابتستحي ؟؟
إنت واحد ثرثار ... ومغرور... وعنجهي ...
إنت ماعاد ينسكت عنك بنوب...ولازم تسكت للأبد ؟؟
خير سيدي أنا شو عملت ؟؟
لك كيف بتتفزلك بالصحف والمجلات وبتحكي بعالي الصوت وبكل ثقة إنك عتبان على وطنك
وإنك مليت من فقرك وإنك محاصر داخل بلدك بجيوش الديون والهموم وإنو الفقر بالوطن غربة
والغنى بالغربة وطن ومن هالعلاك المصدي ؟؟؟
لك إنت مابتستحي .. لك انت مرجعيتك الإعلامية مافهمتك إنو الوطن أسمى من المادة وإنو
الوطنية والمواطنة والإنتماء مافيك تربطها مع المصاري ؟؟
لك وطنك رباك وعلمك وكبرك.. حملك برحم العروبة ... ورضعك من أنهار الصمود وبالنهاية بتعلك
هون وهون وبتعطي صورة سلبية عن بلدك والسبب التافه : إنو مامعك مصاري ؟؟
لك مصاري ؟؟؟ يخرب بيتك...
بس ياسيدي فقري هلكني .... والله العظيم راسم خريطة مشان إعرف فوت وإطلع من البيت
ياسيدي اتعبت من الديون ومن الهموم اتعبت من مشكلة رغيف الخبز يلي عم عاني أكثر من
معاناة من عايش الحروب العالمية كلها لإقدر أمنو ...
سيدي أنا بعشق وطني من بصرى لحدود منبج ... وأنا وكل ما أملك فدا ضحكة طفل سوري..
لكن ياسيدي المغناطيس بيني وبين وطني عم يضعف هيك قلك يعني ؟؟
سيدي الله وكيلك عم شوف المخططات الإستعمارية كلها عم تطلع من درج أبو سالم المحاسب وقت يسلمني الراتب ... هالراتب يلي صاير ألعن من صخرة سيزيف ..
اتخيل سيدي انو يعطوك بحصة صغيرة ويقلولك سكر فيها باب مغارة ؟؟ لك والله مابيمشي الحال
سيدي عم شوف الإمبريالية بعيون أبو علي اللحام لما يزورني ويذكرني بحق كيلو اللحم
يلي اتدينتو وقت هاجموني ضيوفي ..
سيدي عم عيش سوداوية اللحظة بكل تجلياتها وقت يبكي قدامي إبني مشان كيلو موز ؟؟
سيدي فقري عم ينتقص رجولتي .... وأنا سوري مافيني عيش بدون رجولة
إي إخرس هاد مو تبرير وهالأمور التافهة عمومآ مو من إختصاصي ...
بس يطعمني ولايحرمني إنو شوفلك شي مقالة ؟أو زاوية أو خاطرة أوحتى جملة فيها انتقاص
لهيبة الوطن ..... فهمت ولا عيد وزيد ...
أمرك سيدي ... بس عفوآ ما اتعرفنا بحضرتك ؟؟
أنا الكاسر بيك مدير فرع المنامات والأحلام ...
{طن طن ...طن طن ... الباب عم يندق لعما طلع حلم ..}
ياربي لك الحمد طلع حلم ...
ياربي لك الحمد طلع حلم ....
ياربي لك الحمد طلع حلم ...
الرئيسية 
