قصيدة الهوى والنور

جميل الصـدفة اللي جابتك حيي الهوا والنور=== عليك اجمل مسا مسيت عطني منه قنطاره
أحي فيك ذكرك قبل شوفك والنبا مغمـــــــور=== وأحيي فيك عطرك واسمك اللي مالي داره
أنا من مات حي لاطعن حربه ولا منحـــــــور=== صويب العين مايبرا غدا قلبي لك الشاره
بغيت امشي واحس انه غدا مني القدم مبتور=== بغيت آقف واشوف عظام كل الجسم منهارة
أنا من خانته عبرة فرح والا ضحك مسرور=== يضيق إبه النفس وده يقول من الحكي خياره
أشيل اغاني لك عرضه وأبدل به على المجرور== وأمول من طواريقي على عشاق سماره
أبكتب من قصيد الوزن وغيره من شعرمنثور== أنا لك شاعر يكتب وشعره نقوة أفكاره
ألا ياغايب عني معي حاضر كما الدستور===== خيالك ما يفارقني بفكري دق مسماره
إلا من ضقت أسولف بك على نفسي وانا مقهور== وأقول الوقت على ماريد وأختاره
عليك أقبل ومنك أقفي ولا بنيت لك محضور==== أخاف عيون بعض الخلق ترقبنا وسباره
وجدك الله ياحسن كما التحفة وأنا جمهـــور=== أنا المبهور في حسنك وانا من خطفت أبصاره
ومنك العين تامرني وأنا لك طايع مـــــأمور=== على وصلك غدا حظي هوين وقصرت أشياره
أشوف إن الحسن عقبك ولويذكر غدا مبكور=== يقال إنه حسن وللا أنت كل الزين وإبهاره
ألا يابوعيون حق وبعض الوصف خرس حور== عليك الصوت ماهوصوت كما ترنيم قيثاره
بقا قصرك على فالك عساه بطلتك معمور==== تمشي بردهته حافي وتحيا عقبك أزهـــــاره
بريح المسك والعنبر يخالطهم زراق بخور=== إلى أقبلت جا قبلك والى أقفيته غدا إستاره
على هالبوح والتلميح راس المال صدق شعور== وصدقني تري فكري عقب طيفك ماحد زاره
أنا باسألك تعذرني عساي بطلبتي معذور== أشوف الوقت مايعذر ولا فالناس عذاره
أبارسل لك مع النسمه سلام الخافق المكسور== عسى يجبرعزاه إنك تجيه وتنطفي ناره
ذكرت اليوم والساعه ورحله عمر يامستور=== ذكرت الله في خلقك خلق هالزين وأسراره
أعرف أني مناب أول ولا آخر واحد مأسور== وأجمل ماملكته منه طيف دام تذكاره
ألا ياليت لي قلب يطيع الراي وأهل الشور== ضحيه موقف عابر ورحله سفر طياره
وكان الوقت عصرية تعدينا حدود السور === ويم القاهرة طرنا بجو(ن) حافل(ن)أخطاره
مقاعدنا بآخرصف ومقعد سيدي مشغور== على يسراي كان هناك اشوف أطباع جباره
أشوفه كل هالفتنه ثقل واسلوك إطهور== حصين محصن شامخ يبين كبرمقداره
وأشوفه ديمه تحمي نبات الأرض بالممطور== بغيث يوم أشاهدها جرفني فيه تياره
ذهلني مبرم العاتق وشلال الشعر موفور== وذاك المبسم الوردي بلون الزهرقطاره
وقدأطرق هايف رشيق وخاصر مضمور== قوام اعتدال طوله يثير إقلوب جباره
أغني وأغتني بذكره ولاأطمع كود بالميسور== وعودي كم شكي مني بعزفي تبكي أوتاره
أعرف النفس تواقه وأعرف اني منا مسحور== ولكن سحر زينه صار ياخلق الله إشعاره
أنا والليل والهاجس قطعنا بالخيال بحور== أبي منهو يوصلني ومن يعطيني أخبـــــــــــــاره

شكراً الله سعيكم
و شكراًعلى المعاني القوية
ولكن أسلوب الكتابة النبطية يختلف نوعاً ما
مع أطيب التمنيات بالتوفيق

مشكور على مرورك
وعلى ملاحظاتك