ريبورتاج العيد .....بقلمي

يعني يا جماعة إجا العيد وكل عام وانتوا بخير ... والله يعيدوا علينا جميعاً باليمن والبركة ....
بس بالذمة عندي حكي وإذا ما حكيتوا بدي طق :

يعني بعد طول انتظار واستناية للعيد بجيك العيد , بس أحياناً بتقول يا ريتو ما أجا بالمرة .......

وبتكون قبل ما يجي العيد بأسبوعين مبلش تعزيل وضبضبة إذا كان حضرتك مرا والله يعطيكي العافية وراكض ورا رزقك إذا كان حضرتك

زلمة الله يكون بعونك ويبحبحها عليك وبطل عليكون العيد وبتبلش الزيارات والمعايدات .......

وبجيك العالم بقى فرادى ومثنى وثلاث ورباع وأحياناً أكتر كمان انت وحظ بقى

وهاد يلي ببلط عندك ساعة وهاد ساعتين وبجوز بعد 3 ساعات بقلك ما تواخذنا بدنا نلحق معايدة !!!!؟؟؟

يعني بلا مواخذة منيح يلي حس ع دمو وزاق ع حالو بعدين إليه شو ما عندك غيرو بالعيد ؟؟؟؟

( ولا نسيان إنو هي معايدة مو سياحة واصطياف !!! )

والأنكا من هيك لما بيجيك شي أخ كريم مع عيلتو المؤلفة من شي 7 أو 8 نفر مع حضرتو وحضرة الست زوجتو

وببلشوا القرود تبعاتوا المصورين ع هيئة ولاد يقلبوا البيت فوقاني تحتاني وما بخلولك غرض ع غرض بهالبيت

عدا عن الحلو يلي مشي ع السجاد لأنو كل ولد منهن بدو صحن حلو لحالو وما بياكل بإيد أمو يقبر أمو لأنو شخصية

وبعد شي 3 أو 4 ساعات إذا مو 5 بيستسمح منك وبقلك " تسمحلنا "

كأنك انت ماسك بأواعيه ونازل حلفان آيمين ليضل عندك هو وقبيلتوا ......

( يا أخي والله بيوت العالم إلها حرمتها مو مرتع لإلك ولا ولادك يا ضبطهن ببيت الجماعة يا أما اقضي معايدتك ع التليفون وبلا جيتك وبكون ممنونك )

يمكن بتاني ولا تالت يوم العيد بصحلك تطلع انت وعيلتك بقى وتبلش معايداتك ....

وكونك أخ من الطبقة الكادحة وحالتك ع أدها بتوقف ع الموقف لتأشر لشي مكرو ....

هون بتحاكيك نفسك اللوامة وبتقلك :

" والله الدنيا عيد يا زلمة شوف مرتك وولادك شلون لابسين جديد وفرحانين بأواعيهن يلي حطيت حقه
دم قلبك وعم يوجوا وج فيهن .... ضروري هلأ تزفتلهن عيدهن بركبة المكاري ... "

وبتتوكل ع الله وبتأشر للتكسي .. بتوصل لمشوارك وبتقوا للشوفير ع اليمين زكاتك وبتتطلع ع العداد يلي طلع عليه 60 ل.س وبتناولوا 75
ل.س ....لأنك كريم والدنيا عيد

بيجئر فيك الشوفير وبقلك بابتسامة عريضة " كل عام وانت بخير ؟؟؟!!! "

( إيه يعني والله فهمنا وعيب عليك , الحال من بعضو ولو لأنو شفتو للزلمة مطقم هو ولادو ومرتو .... وبدك تطلع غلة السيارة تبع الشهر كلو بأيام العيد بس ومن رقبة العباد !!!؟؟؟ )

وهون بكون الأخ الكريم أبو العيال تفشش بمرتو وولادو ولعن الساعة يلي ركبهن فيها تكسي
وفاتوا ع بيت العيلة كل واحد حاطط العقدة شكل وبارم بوزو شبر ...

لسا ما بتلحق تقعد بنطولك ولادك بابا بابا بدنا نعايد مع ولاد عمي وولاد عمتي ... علماً إنو بكونوا هلأ راجعين من العيد !!!!

بتقول بينك وبن حالك أمري لله الدينا عيد والولاد بدهن يلعبوا ... وبلطوا منك هديك الحسبة وبوشهن ع العيد

أما بقى شو عيد الله لا يورجيك يعني ( خصوصاً عيد المزة ) ؟؟؟!!!!

يعني ما بتعرفوا عيد ما بتعرفوا سوق ميلة ما بتعرفوا محشر .... ما هب ودب

من جميع المقاسات والأعمال من ولد 5 سنين إلى رجال 35 سنة , شيبة وشباناً والله شلون آمنت تبعتهن لحالك مالي عرفان ؟؟؟!!!!

وبيرجعوا ولادك والحمد لله ع سلامتهن وحميد ربك يلي ما حدا منهن ضاع ولا نخطف ولا رجع ناقص إيد ولا رجل !!!!!

وكل واحد منهن صارفلو شي 400 ل.س

بتسألو ليش شو ساويت وبشوا لعبت ؟؟؟؟

بقلك ركبت بمرجوحتين ودويخة وفتت ع السيرك !!!!!

والسيرك وما أدراك ما السيرك !!!!!

( يا أخي انت فتت شي مرة ع السيرك وشفت شو بيصير بقلبو ؟؟؟ لكن كيف آمنت وبعتت ولادك لهيك أماكن " كلكم راع وكلكم مسؤول عن رعيته " )

وخلص العيد ومشي الحال وكل عام وانت بخير وبالرغم من كل هي الشغلات بتلاقينا كل واحد مشأرء ومبسوط وضحكتوا لورا أدانو

الله يديم علينا بهجة العيد ويعيدو علينا وعليكم جميع

ولا تواخذونا ع الإطااااااااااااااااالة

ريبورتاج عيد جميل
مشكوره اخت سنا على الموضوع الرائع

نشالله الله يعيدو على أمت محمد بالخير والسعاده

بس والله كلامك صحيح ميه بالميه
وهو ضروري بالاصل يجيب شي ست ولاد
يعني الواحد منى ياأأأأأأخي جيب ثنين ثلاثه
وأحسن تربايتهم وعلمهم والله أحسن
أي أي الرزق على الله
بس الله بالعين ما نشاف بس بالعقل نعرف
ومشكوره على الموضوع

وما قصرتي

والله يسعدك على هل كلام

[ندعوك للتسجيل في المنتدى أو التعريف بنفسك لمعاينة هذه الصورة]

تسلم فهد جدة وتورت الموضوع بردك الجميل

هههههههههههههههههههههههههه

والله هاد الوااااقع تماما
ومصور بدقة
بس شو فينا نعمل ؟؟؟؟؟
كل عام وانم بخير
والله يعيده على الجميع بالخير والبركة

[ندعوك للتسجيل في المنتدى أو التعريف بنفسك لمعاينة هذه الصورة]

نورتي مون الله يسلمك

ياسلام وصف دقيق

شو كأنك صحفيه سناء هههه

بس الموضوع حلو

لا ماشاء الله عليكي عندك مواهب

حسيتك حكواتية

عكل مشكورة وكل عام وانتي بخير وصحة وسعادة

ونحنا وبلدنا بالف خير

مامنقول الا الحمد لله

نورتوا الموضوع محمد غندور وكبير المشرفين وفل الشام
مضويين ماشالله

هههههههههههههههههههههههههههههههههههههههه ونحن بننحبس مع امهاتنا للاحتياط وبروح علينا العيد

يسعد كل اوقاتكم أجمعين
وكل عام وأنتم بخير

أختي سناء
كلامك جميل جدا" وملاحظتك بمحلها ورااائعة
تصوير وكأننا كنا بهذا المشهد وفعلا إبداع جميل من قلم يجيد نقل الإحساس ليترجمها إلى حروف وكلمات تنساب إلى القلوب وتحرك المشاعر
وصدقيني ضحكت كثيرا" على وصفك وكلماتك !!! فالذوق يا أختي لا يباع ولا يشرى
وشكرا" جدا" لهذه المشاركة واذا فيكي كتري منها 00009

السلام عليكم

فعلا المشاعر و الإحاسيس تنفجر في مواقف معينة

و العيد و زحمته تنفجر معه مواقفه الطريفة لدى كل إنسان

و انت اخت سناء فجرت بركان موجود في داخل كل واحد منا

و لكن يبقى موهبة السرد و الكتابة وحدها يمتلكها أناس مميزين مثلك

بارك الله فيكي و بقلمك

و ان شاء الله بتصيري روائية مشهوره

بس لا تنسينا لما تصيري مشهورة

رح نجي نباركلك بشي ساعتين أو خمسة ساعات أنا و وولادي و وولاد الجيران

تقبلي شكري و تقديري

شكراً للصحافة التي تكلمت بألسنة الناس الذين يعانون من واقع لا تجدوا مفر منه

يعطيكي العافية سناء

عن جد يا جماعة انبسطت كتير بمروكن بموضوعي
وزدتو من ثقتي بنفسي بهي الردود
شكراً أخ حسان - المدير - اليمامة ولرشا كمان

» بقلمي ............
» صرخات ( بقلمي )
» أغبياء القرن الواحد والعشرين ( بقلمي )
» كلمـآت مبعثرة على ضفآف الشوق .بقلمي!
» كعك العيد وصل ..