التختوخة كمان أكلة قطناوية شتوية
كتير طيبة كمان
وهي عبارة عن كشك + بصلة مفرومة ناعم +لحمة مفرومة ناعمة ولازم تكون مدهنة شوي أو ممكن اضافة قطع دهنة ناعمة + ملح وشوية فلفل اسود
في ناس بيحبو يحطو معها بطاطا مقطعه مربعات كتير صغيرة
الطريقة
نقلي اللحمة المفرومة( طبعا اطيب اذا لحمتها كتيرة شوي ) مع الدهنة وبنضيف عليها البصلة المفرومة والملح والفلفل
اذا حبيتو تضيفو البطاطا المقطعة مربعات صغار طبعا لازم نضيف ماء ( مي ) بكميات قليلة شوي شوي لحتى تستوي البطاطا طبعا ما بتاخد وقت لأن القطع صغار
وبعدين بنضيف الكشك تقريبا شي 4 او 5 ملاعق اكل بنحركها شوي وبنقلبها وبعدين بنضيف عليها المي السخنة وياريت ما تضيفو كمية مي كتير لأن الكشك كل ما غلى عالنار بيسمك
يعني بتضيفو شي كاسة ونص مي وبتحركو الأكلة اذا لقيتوها سميكة كتير بتضيفو مي حسب الحاجة بتستمر عالنار شي ربع ساعه
ملاحظة : لازم بالنهاية تكون شوي سميكة يعني ما تساووها متل الشوربة
بالنهاية بتنسكب وبيتقدم معها بصل اخضر وفجل ومخللات
وصحتين والف هنا 
الرئيسية 
