فالج لا تعالج!!!!!!!!!!!!

اليوم يا جماعة الخير رح نحكي عن شوارعنا و النظام اللي لله الحمد غير مُطبّق و لا بشكل من الأشكال.

يعني مثلاً كلنا لاحظنا الرادارات اللي انحطت بأغلب الشوارع و قوانين تحديد السرعة اللي أكيد هدفها الأول و الأخير تخفيف حوادث السير اللي بيروح ضحيتها الآلاف من البشر إضافة للخسائر المادية من السيارات . المهم من وقت ما طلع هالقانون و العالم بلشت تفكر كيف بدنا نهرب من الرادار و ما يلقطنا !!! تقولوا الرادار بعبع ، شي صار يحط مدري شو على رقم السيارة و ناس تانية رشت الرقم ما بعرف بشو و هاد الفهيم اللي بيمشي بالسرعة اللي بده ياها و بس يقرّب من الرادار بيخفف السرعة مشان ما يلقطوا تقولوا هالرادارات مركبة لتصور العالم مو لتحميهم و لمصلحتهم .
يعني عن جد بحياتي ما شفت ناس عندها هوس بمخالفة قوانين السير غير عنا يعني الكل بيتسابق مين بده يلعب على الرادار و يسوق على كيفه بلا حساب لحياته أو حياة الآخرين .( يعني مو حلوة مشان سمعته )
و كله كوم و حزام الأمان كوم يعني و الله انحط لحماية السائقين مو مشان الشرطي ينبسط بس تمر من جنبه سيارة و الشوفير حاطط الحزام ( صدقوني ما رح يجيه شي من ورا الحزام اللي حضرتك حاطه) . بتجي بتلاقي شوفير ( طبعاً ما حاطط الجزام يوه عيب يحطه !!!! ) بس يشوف شرطي قدامه بمد ايده و بيشد هالحزام و بس قطع الشرطي بيرجع بيفلته كأنه الحزام للشرطي !!!!

غير بقى المطاحشات و هاد اللي بده يكسر على التاني و يسبقه بتقولوا العالم هالقد وقتها ثمين ( يا اخي مستعجل طلاع من بيتك أبكر بنص ساعة ما بتخرب الدنيا ) يعني لسى ما بتصير الإشارة خضرا بيبلش التزمير كأنه هالكم ثانية رح يحرروا فيها فلسطين !!!! و يا مسكين هالشوفير اللي حظه التعيس بخلي سيارته تطفي معه عند الإشارة بعد ما فتحت ما بيبقى سيارة بالشارع ما بتزمر له و ما بيبقى مسبة ما بياكلها .

و لا لمّا تكون بنت عم تسوق سيارة بتبلش هالشباب الطيبة غلاظات و هاد اللي بيكسر عليها و هاد اللي بيزمر لها لك حتى بالسيارة في تلطيش!!!!! عن جد شي بيضايق حلّوا عنها للمخلوقة من غير شي بتكون خايفة من السواقة بهالشوارع بين سيارات الموت بتجوا بتزيدوا الطين بلة .

هلء مشان ما نظلم صحاب السيارت و الشوفيرية و نحط الحق بس عليهم لازم نحكي على المشاة بالشارع . هدول لحالهم قصة . يا جماعة بتتذكروا وقت كنا صغار و ماما و بابا بدهم يعلمونا نقطع الشارع و الله بتذكر كانوا يقولوا لنا بتلتفتوا على اليمين و بعدين على الشمال و بتتأكدوا ما في سيارات و بعدين بتقطعوا . بس الظاهر العالم اليوم نسيت يا أما أهاليهم ما بقى علموهم مزبوط !!!
مو ملاحظين كيف الناس عم تقطع لك ما بقى حدا اطلع لا يمين و لا شمال و لا بيكلف خاطره و بيوقف الطريق ملك أبوه بيكمل و الشوفير هو اللي لازم ينتبه و ما يدعسه !!!! و لا الناس على الإشارة طيب و الله عملوا إشارة للسيارات و إشارة للناس ليش الناس بتحب تمشي على هوا إشارة السيارات ما كنت أعرف ، يا جماعة وقت إشارة المرور بتكون خضرا يعني بس السيارت يمشوا انتوا وقفوا مشان الله وقفوا .


يمكن لو بضلّ احكي من هون لبكرا ما بخلص .
مشان هيك صار لازم اسكت . و الله النظام حلو و القوانين موجودة لراحة و حماية كل من السائق و المشاة فياريت نلتزم فيها .

ياسيدي الله يعطيك العافية يارب بالفعل شي غريب عجيب يلي عم يصير لك لعمش هون عنا من شان يكتمل النظام صاروا يخالفوا المشاة يلي عم يقطعوا الطريق خطا وكيف مابدون يخالفوون اذا كل الطرقات مجهزة باماكن لعبور المشاة ولأ شو كمان اذا المشاة بدون يقطعوا الطريق واشارة المرور مفتوحة للسياراتفي زر على عمود الاشارة بكل بساطة بيكبسوا الزر وبثواني بتتوقف السيارات ياخي شي غير شكل والله النظام كتير حلو خلينا نجرب نمشي على النظام شوي بركي بتتغير نظرة العالم عنا شوي